د شمال زون والیبال سیاليو اتلولي خراسان لوبډلې وګټله
په شمالي ولایت بلخ کې د شمال زون د والیبال سیالۍ نن په پایلوبې سره تمامې شولې.
د یادو سیالیو پایلوبې ته د بلخ کامایر او ننګرهار خراسان خصوصي پوهنتون لوبډلې وتلې وې، چې اتلولي خراسان لوبډلې پخپل نوم کړه.
په پایلوبه کې خراسان لوبډلې کوربه لوبډلې ته درې د دوه پر وړاندې ماتې ورکړه او اتلولي یې وګټله.
په دې سره خراسان لوبډلې د یادو سیالیو لومړی مقام وګاټه او کامایر لوبډلې دویم مقام خپل کړ. همدارنګه د د الفتح قولاردو لوبډلې درېیم او د کابل ښاروالۍ لوبډلې څلورم مقام کې ځای لري.
د دغو سیالیو په جوړولو کې له والیبال فدراسیون سره د بلخ ولایت ورزشي امریت، ارمان شرکت او کفایت شرکت همکاري کړې ده.
یاده دې وي، چې په دغو سیالیو کې شپږو لوبډلو ګډون کړی و، چې د سلواغې میاشتې په شلمه نېټه پیل شوې او نن پای ته ورسېدلې. یادې ټولې سیالۍ مزارشریف ښار د امام خمیني والیبال لوبغالي کې وشولې.
