د المپیک ملي کمېټې او سپورټ عمومي ریاست رئیس د غزني ولایت جاغوري ولسوالۍ ته سفر وکړ
د هېواد د المپیک ملي کمېټې او سپورټ عمومي ریاست رئيس انجنیر نظرمحمد مطمئن د غزني ولایت جاغوري ولسوالۍ ته د ورزش د وضعیت د ارزونې په موخه سفر وکړ.
په دې سفر کې له ښاغلي مطمئن سره ډاکټر جعفر مهدوي او د بدني روزنې او سپورټ د عمومي رياست د دفتر رئیس محمد الله احساس ملتيا کوي.
نن سهار ښاغلي مطمئن د نېزه وهنې د سیالیو د پای له مراسمو ليدنه وکړ او غوره ورزشکارانو ته یې ډالۍ ورکړې.
دغه سيالۍ څلور ورځې وړاندې د جاغوري ولسوالۍ د بېلابېلو سیمو د دولس ورزشکارانو په ګډون پيل شوې وې، چې نن د روح الله په لومړي، د علي سينا په دویم او د علي شاه په درېیم مقام ګټلو سره پای ته ورسېدې.
