د افغانستان د فوټسال "غوره لیګ" سیالۍ د صداقت کابل لوبډلې په اتلولۍ پای ته ورسېدې
د هیواد د فوټسال دویم پړاو غوره لیګ سیالۍ چې شاوخوا ۲۲ ورځې وړاندې د لسو لوبډلو په ګډون پلازمېنې کابل کې د فوټبال فدراسیون په جمنازیوم کې پیل شوې وې د صداقت کابل لوبډلې په اتلولۍ پای ته ورسېدې.
د دې غوره لیګ دویم پړوا سیالیو پایلوبې ته د " کابل صداقت او پیروزي پنجشېر" لوبډلو لار ومونده چې د " ۵ - ۱ " ګولونو په توپیر د صداقت کابل په اتلولۍ او د پیروزي پنجشېر لوبډلې په دویم مقام ګټلو پای ته ورسېده.
د دغو سیالیو غوره لوبغاړی، رضا "حسینپور"، غوره ګول ساتونکی عباس "رستمنژاد" او غوره ګول وهونکی علي "امیري" اعلان شول.
په سیالیو کې "سعادت نیمروز، زیتون کابل، ظاهر اسد کابل، سرپل باستان، اتحاد هرات، جوانان خراسان بغلان، عصر جدید غزني، پیروزي پنجشیر، صداقت کابل او شمس هرات" لوبډلو ګډون درلود.
د پای په مراسمو کې د افغانستان د المپیک ملي کمېټې او سپورټ عمومي ریاست رئیس انجینر نظرمحمد مطمئن ، فني او مسلکي مرستیال حافظ احمد جان ځدراڼ، د بدنې روزنې او ورزش عمومي ریاست د دفتر رئیس محمد الله احساس، د فوټبال ملي فدراسیون مشر یوسف کارګر او ګڼو نورو ورزشي مسوولینو او د ورزش ګڼ شمېر مینوالو ګډون کړی وو.
دا سیالۍ له اریانا ټلویزیون څخه په ژوندۍ بڼه نشرېدلې.
د پای په مراسمو کې ګټونکې لوبډلې ته کپ او غوره لوبغاړو ته مډالونه، ستاینلیکونه او نورې ډالۍ ورکړل شوې.
د یادونې وړ ده، چې د افغانستان د المپیک ملي کمېټې او سپورټ عمومي ریاست مشرتابه له لوري په دې سیالیو کې د غوره چوپړتیاو په پار لوبڅاران، کمیشنران، د اریانا ټلویزیون، افغان بسیم مخابراتي شرکت، د اریانا ثابت خصوصي روغتون او امنیتي مسوولین او ډاکټران هم د ډالیو په ورکولو سره وستایل شول.
