د افغانستان د فوټبال ١٧ کلنو ملي لوبډله د اسيا ملتونو جام او نړيوال جام ته په مقدماتي سیالیو کې د ګډون او لوبېدو په موخه ټايلنډ ته روانه شوه
د افغانســــــــتان ١٧ کلنو فوټبال ملي لوبډلې د فوټبال فدراسیون له مشر محمد يوسف کارګر سره تر ليدنې او مخې ښې وروسته د اسيا جام او نړيوالو جام ته په مقدماتي سیالیو کې د ګډون او لوبېدو په موخه ټايلنډ ته روانه شوه.
په همدې مناسبت مراسمو کې د فوټبال فدراسیون رئیس محمد يوسف کارګر، د المپیک ملي کمېټې او سپورټ عمومي ریاست د نشراتو رئیس الله محمد اتل مشواڼي او د فوټبال فدراسیون اړوند نورو مسوولینو شتون درلود.
د فوټبال فدراسیون رئیس محمد يوسف کارګر له دغو ورزشکارانو سره په ليدنه کې خوښي وښوده، چې په لومړي ځل د افغانستان د فوټبال ١٧ کلنو ملي لوبډله د نړيوال جام په مقدماتي سیالیو کې ګډون کوي.
ښاغلي کارګر هيله څرګنده کړه، چې که ياده لوبډله په اسيا ملتونو جام کې ښه لاسته راوړنې ولري؛ نو مستقیماً به نړيوالو جام ته لار ومومي.
نوموړي د نورو هېوادونو د فوټبال لوبډلو امکاناتو ته په کتو د افغانستان لوبغاړي ښه و ارزول.
کارګر همداراز له لوبغاړو څخه وغوښتل چې پر وخت خپل تمرين او نورو کارونو ته رسيدنه وکړي.
ټاکل شوې د اسيا ملتونو او نړيوال جام مقدماتي سيالۍ به د روانې جون مياشتې په ١٥مه نېټه رسماً پیل شي.
له افغانستان څخه په دغو لوبو کې ٢٨ تنه ګډون لري، چې ٢٣ تنه يې لوبغاړي او پاتې نور يې روزونکي، مدير او د پلاوي مشر تشکيلوي.
افغانستان د دغو سياليو په "ب" ګروپ کې له ايران، قطر او جنوبي کوريا سره لوبې لري.
د فوټبال فدراسیون د معلوماتو له مخې افغانستان به د جون په ١٦مه نېټه په خپله لومړنۍ لوبه کې د ايران پر وړاندې د لوبې ډګر ته ښکته شي.
