خوست؛ يعقوبيو صبریو ولسوالۍ کې د ٤٠ لوبډلو ترمنځ د ټېپ بال کرېکټ سیالۍ پیل شوې
د خوست ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولایت په یعقوبیو صبریو ولسوالۍ کې د ٤٠ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د بیدار افغان او ایلیون سټارز لوبډلو ترمنځ ترسره شوه. د لوبې پچه بیدار افغان لوبډلې وګټله او لومړی یې توپوهنه وکړه، چې په ټاکلو اتو اورونو کې یې د دوو ویکټو په زيان سره خپلې سیالې لوبډلې ته د ١٠٤ منډو هدف وټاکه. ایلیون سټارز لوبډلې ټاکلی هدف د لوبې په وروستي اور کې د درېوو ویکټو په زیان پره کړ او د اووه ویکټو په توپیر یې د سیالیو لومړۍ بریا خپله کړه.
دا سیالۍ د سیمې د خلکو لپاره د سالمې تفرېح برابرولو په موخه پیل شوې دي، چې یوه نیمه میاشت به دوام وکړي.
