تخار؛ دشت قلعه ولسوالۍکې د ۱۲ لوبډلو ترمنځ د واليبال ليګ پای ته ورسیده
د تخار ولايت د بدني روزنې او ورزش امريت اړوند د واليبال ملي فدراسيون د استازولۍ له لوري د ياد ولايت په دشت قلعه ولسوالۍ کې د خزاني جام په نوم د ۱۲ لوبډلو ترمنځ د واليبال ليګ سيالۍ د اي خانم باستان لوبډلې په اتلولۍ پای ته ورسېده.
د دغو سياليو په پايلوبه کې ای خانم باستان لوبډلې خپلې سیالې امو لوبډلې ته د ۳/۰ ميدانونو په توپير ماتې ورکړه او اتلولي يې خپله کړه.
د يادو سياليو موخه د واليبال ورزش ته وده ورکول او د ځوانانو هڅوول و، چې دوې اوونۍ يې دوام وکړ.
د سياليو په پای کې د تخار ورزشي امريت له لوري غوره لوبډلې ته د اتلولۍ جام او غوره لوبغاړو ته ورزشي ډالۍ ورکړل شوې.
