ارزګان؛ مرکز ترینکوټ ښار کې د ۱۲ لوبډلو ترمنځ د ټېپ بال کرېکټ سیالۍ پای ته ورسېدې
د ارزګان ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د یاد ولایت مرکز ترینکوټ ښار کې د ۱۲ لوبډلو ترمنځ د ټېپ بال کرېکټ سیالۍ د ګولډن سټار لوبډلې په اتلولي پای ته ورسېدې.
د دغو سیالیو پایلوبه د ګولډن سټار او منظور لوبډلو ترمنځ ترسره شوه. د لوبې پچه ګولډن سټار لوبډلې وګټله او لومړی یې توپ وهنه وکړه، چې په ټاکلو ۱۴ اورونو کې یې د شپږو ویکټو په زیان خپلې سیالې لوبډلې ته د ۲۴۱ منډو هدف وټاکه. منظور لوبډلې د هدف په تعقیب کې د ټولو ویکټو په زیان ۱۲۱ منډې وکړې او د ۱۱۹ منډو په توپیر یې لوبه وبایلله.
حشمت الله د ۲۷۰ منډو په ترسره کولو سره د دغو لوبو غوره توپ وهونکی او حبیب الله د ۱۶ ویکټو په اخیستو غوره توپ اچونکی ونومول شو.
دا سیالۍ د غوره لوبغاړو د موندلو په موخه ترسره شوې، چې ۲۴ ورځې یې دوام وکړ.
