خوست؛ مرکز متون ښار کې د شپږو لوبډلو ترمنځ د ټېپ بال کرېکټ سیالۍ پیل شوې
د خوست ولایت د بدني روزنې او ورزش امریت له لوري د ياد ولايت د مرکز متون ښار په درګوټيو کلي کې د شپږو لوبډلو ترمنځ د ټېپ بال کرېکټ پنځم پړاو ډي پي ايل ليګ سیالۍ پیل شوې، چې ۲۰ ورځې به دوام وکړي.
د دغو سياليو لومړۍ لوبه دميرزاخېلو او د وصال برېښنا کرېکټ کلبونو لوبډلو ترمنځ ترسره شوه ، د ميرزا خېلو لوبډلې د پچې په ګټلو سره د توپ وهنې پرېکړه وکړه چې په ټاکليو ۱۰ اورونو کې یې د پنځو لوبغاړو په سوځېدو سره مقابلې لوبډلې ته د ۱۲۳ منډو هدف وټاکه. په ځواب کې د برېښنا وصال لوبډلې په ټاکليو ۱۰ اورونو کې د پنځو لوبغاړو په سوځېدو سره يواځې ۱۰۹ منډې جوړې کړې او لوبه يې د ۱۴ منډو په توپير وبايلله.
