سمنګان؛ ظفر لوبډلې د ايبک ښار د فوټبال غوره ليګ اتلولي وګټله
د سمنګان ولایت د فوټبال فدراسیون او سپورت ریاست لوري د دغه ولایت د اطلاعاتو او فرهنګ ریاست په همکارۍ د ۱۱ لوبډلو ترمنځ د فوټبال غوره لیګ سیالۍ، چې درې میاشتې وړاندې د مرکز ایبک ښار په لوبغالي کې پیل شوې وې؛ تېره ورځ د ظفر لوبډلې په اتلولۍ پای ته ورسیده.
د لیګ د پای په مراسمو کې د سمنګان والي الحاج مولوي عبدالاحد فضلي، د یاد ولایت د سپورت رئیس، د فوټبال فدراسیون مسوولینو، د اطلاعاتو او فرهنګ مسوولینو، دولتي چارواکو او ګڼ شمېر مینوالو ګډون کړی و.
د دې سیالیو پایلوبه د ظفر او پیروزي لوبډلو ترمنځ وه چې په پایله کې د۰-۰ ګولونو په توپیر مساوي پای ته ورسېده؛ خو ظفر لوبډلې د ۳۰ امتیازونو په لرلو سره دا سیالي وګټله او پیروزي لوبډلې دویم مقام خپل کړ.
په پای کې د سیالیو لومړی مقام ګټونکې لوبډلې ته د اتلولۍ کپ او د سمنګان ولایت د والي الحاج مولوي عبدالاحد فضلي له لوري لس زره افغانۍ او دویم مقام ګټونکې لوبډلې ته پنځه زره افغانۍ ورکړل شوې.
د دغو سیالیو موخه په سمنګان کې د فوټبال د غوره لوبغاړو پیژندل وو.
