هلمند؛ ګرشک ولسوالۍ کې د ۲۴ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولي له لوري د یاد ولایت په ګرشک ولسوالۍ کې د ۲۴ لوبډلو ترمنځ د ټېپ بال کرېکټ سیالۍ د ودان لوبډلې په اتلولي پای ته ورسېدې.
د یادو سیالیو پایلوبه د ودان او افغان لوبډلو ترمنځ ترسره شوه. د لوبې پچه افغان لوبډلې وګټله او لومړی یې د توپ وهنې پرېکړه وکړه، چې په ټاکلو ۱۴ اورونو کې یې خپلې سیالې لوبډلې ته د ۱۵۲ منډو هدف وټاکه. ودان لوبډلې ټاکلی هدف د خپلو پنځو لوبغاړو په له لاسه ورکولو سره د لوبې په یوولسم اور کې ترلاسه کړ او په پنځو ویکټو یې د دغو سیالیو اتلولي وګټله.
دا سیالۍ ورزش ته د ځوانانو د هڅونې په موخه ترسره شوې، چې یوه میاشت یې دوام وکړ.
