کونړ؛ منورې ولسوالۍ کې د ټېپ بال کرېکټ سیالۍ پای ته ورسېدې
د کونړ ولايت د بدني روزنې او ورزش آمريت په همغږۍ، د ټېپ بال کرېکټ فدراسیون د استازولۍ له لوري د منورې ولسوالۍ په کوټ سيمه کې د ۴۰ لوبډلو ترمنځ د ټېپ بال کرېکټ سیالۍ، چې شاوخوا ۴۰ ورځې مخکې پيل شوې وې د کونړ مرکز لوبډلې په اتلولۍ پای ته ورسېدې.
د يادو سياليو پايلوبه د کونړ مرکز او ماموند زلمي لوبډلو ترمنځ وشوه، د لوبې پچه ماموند زلمي لوبډلې وگټله او لومړی يې د توپ وهنې پرېکړه وکړه، چې په ټاکلو ۸ اورونو کې يې ۷ لوبغاړو په سوځېدو سره خپلې سيالې لوبډلې ته د ۷۷ منډو هدف کېښود، په ځواب کې کونړ مرکز لوبډلې ياد هدف په ۵م اور کې ترلاسه کړ او لوبه يې د ۶ ويکټو په توپير وگټله.
