د کابل د سنوکر منتخبې لوبډلې ټاکلو سيالۍ پای ته ورسېدې
د هيواد د المپيک، بدني روزنې او سپورټ لوی رياست اړوند سنوکر فدراسيون له لوري په کابل اسيا قهرمان کلب کې د ۱۰۰ ورزشکارانو ترمنځ د کابل منتخبې لوبډلې د سنوکر ټاکنيزې سيالۍ پای ته ورسېدې.
په دغو سياليو کې د المپيک، بدني روزنې او سپورټ لوی رياست اړوند د دعوت او ارشار رياست استازو، د سنوکر فدراسيون مسوولينو، ورزشکارانو او د سنوکر ورزش مينوالو ګډون کړی و.
دغه سيالۍ، چې يوه اوونۍ يې دوام وکړ، د درېيو کټګوريو (تنکيو ځوانانو، ځوانانو او لويانو) د ۱۰۰ ورزشکارانو ترمنځ ترسره شوې، چې په پايله کې د لويانو په کټګورۍ کې ۱۶، د نويو ځوانانو په کټګوري کې اته او په ځوانانو کټګوري کې هم اته ورزشکاران، چې ټولټال ۳۲ ورزشکاران کېږي د کابل منتخبې لوبډلې ته وټاکل شول.
هېره دې نه وي چې په پای کې اتلو ورزشکارانو ته کپونه او ستاينليکونه ورکړل شول.
