زابل؛ په قلات ښار کې د ۲۰ ورزشکارانو ترمنځ د پاورلفټينگ ټاکنیزې سيالۍ پای ته ورسېدې
د زابل ولايت د بدني روزنې او سپورټ امريت اړوند د پاورلفټينگ فدراسيون د استازولۍ له لوري په مرکز قلات ښار کې د ۲۰ ورزشکارانو ترمنځ د ياد ولايت منتخبې لوبډلې ته د غوره ورزشکارانو ټاکلو په موخه په درېوو عمري کټگوريو کې د پاورلفټينگ ټاکنیزې سيالۍ پای ته ورسېدې.
دغه سیالۍ، چې دوې ورځې يې دوام وکړ، په پايله کې په نويو ځوانانو کټگورۍ کې نصيب الله دوران لومړی، په ځوانانو کې نعمت الله قيوم لومړی او په لويانو کټگورۍ کې بيا کريم الله اتل لومړی مقام ترلاسه کړ.
د يادو سياليو په پای کې د ياد ولايت د ورزش امريت له لوري غوره ورزشکارانو کپونه، مډالونه او ستاينليکونه ورکړل شول.
